Im Früehlig 1931, am 19. April, isch Papa als füfts Chind vo Abraham u Maria Jungen-Bircher uf d Wält cho. Zäme mit syne sächs Gschwüschtertli hät är ir Gruebe dörfe ufwachse u hät o da d Schuel bsuecht.

Vo syne Wanderjahr zwüschem Wälsche u Gstaad hät är ging gärn verzellt. Sigis als «chumm mer z Hilf» bim Götti, z La Tour, bimene Spängler u Dachdecker oder als Chnächt bi verschedene Bure.
Im Jahr 1957 hät e Teil vor Familie Junge bschlosse, sich z verändere u si hei mit dr Chercotta bi Lausanne ä nüwi Heimat gfunde. Bir Abschidswanderig uf ds Wildhore, gmeinsam mit de Nachbure, hät Papa am Mueti Gfalle gfunde.

Wo ds Mueti speter e Bsuech uf dr Chercotta gmacht hät, si du d Funke zwüsche ünsne Eltere definitiv gsprunge. Nach dr Verlobig am Nüwjahr 1960 isch am 7. Mai d Hochzyt gfyret worde. Ds Mueti isch nach dr Hochzit zur Familie Junge i ds Wälschland zoge.
Will aber uf em Burehof grossi Inveschtitione i Maschine u i d Gebäude were nötig gsy, bschliesse alli, nach anderhalb Jahr wieder i ds Saaneland zrugg z cho. Papa u ds Mueti sy im November 1961 mit em vier Monet alte Peterli im Gepäck zrugg i d Gruebe, i ds Elterehuus vom Mueti yzoge.
Papa hät wider i ds Elektrohus von Allmen im Gstaad chönne ga wärche. Bi von Allmen isch är o scho vor em Ufenthalt uf der Chercotta gsy. Dr Chindersäge hät o i de Jahr 62, 63 u 65 aghalte. Mit Markus, em Käthi u Anni isch d Familie jetz uf sächs Persone agwachse.

Will d Platzverhältnis scho vor der Geburt vom Anni langsam knapp worde sy, hei sich ünser Eltere uf d Suechi nach Bouland gmacht. Im Grund hei si 1964 e geeignete Platz gfunde u bald scho afa boue. Papa hät viel uf der Boustell gwärchet. Mängisch isch är nach der Arbeit sogar uf em Ligistuhl uf em Bou übernachtet, sodass är o vor der Arbeit no hät chönne witerwärche.
Am 14. Dezember 1965 sy si bi strahlendem Winterwätter i ds Erlehus zoge. Dr ganz Umzug hei si mit em absolut ideale Fahrzüg, em «Döschwo», gmeischteret. Nachdäm d Zügelarbeite sy abgschlosse gsy, hei si d Änte verchouft u Papa isch vo da a mit em Velo uf d Arbeit gange. Äs isch guet gsy, häts mit em nüwe Heim meh Platz gä. Sy doch im Oktober 1966 d Elisabeth u vier Jahr speter no Ueli uf d Wält cho.

Ganz e strubi Zyt isch gsy, wo Papa wägeme Arbeitsunfall e Hirnbluetig hät ka. Uf de Foto wo ds Mueti Papa zu sym 40. Geburtstag i ds Spital bracht hät, hät är keis vo syne Chind erkännt u ds Mueti hät nit gwüsst, ob Papa wieder gsund usem Spital wird cho. Mit sächs Chind zwüsche acht Monet u nün Jahr u eme schwer chranke Ma im Spital hät äs all Händ voll z tüe ka. Zum Glück isch Papa gsund worde u hät witerhin für syni Familie chöne sorge.

Nach vielne Jahr bir Firma von Allmen hät Papa d Arbeitsstell gwächslet. Bis zu syr Pensionirig hät är du no ar Wispile-Bahn gwärchet. Papa hät o Hobbys ka. Gärn hät är sich um syner Hühner, Änte u Chüngel kümmeret. Syni grossi Lydeschaft sy syner Bieni gsy.

Viel Zyt hät Papa ir Boutique verbracht. Stundelang hät är chönne usprobiere u pröble, bis öppis eso usacho isch, wien är sich das vorgstellt hät. Ob us Holz oder Metall, wemu irgend e Wunsch für öppis ka hät, oder e kaputta Gägestand zum Flicke, so hät Papa das ir Boutique gmacht. O hät är mit syr Pfyfe oder emene Villiger-Kiel-Stumpe gmüetlich chönne vor em Hus uf em Bänkli sitze. Eifach sy u gniesse, was es grad hät z gseh u z ghöre gä. Sigi das emene Vogel zuelose, wo zwitscheret oder der Sunne zuegugge, wie si undergeit.

Das wier alli e richtiga Bruef, wis Papa gseit hät, hei chönne lehre, hät ihn sehr gfrüwt u isch mu wichtig gsy. Är sälber hät di Chance nie ka oder sa nit chönne wahrnä. Grossi Fröid hät Papa o a syne nün Grosschind ka. Wen är für sie öppis hät chöne boue, hät är das gäre gmacht. No lieber aber isch är mit ihne stundelang ir Boutique gsy für mit ne z wärche. Oder är isch mit ne ga spaziere u hät ne uf em Wäg allergattig zeigt u erklärt. A di viele gmeinsame Stunde mit Grosspapa wärde sie sich no lang bsinne.

Vor sächs Jahr hät dr Tod vom Mueti ä grossi Lücke i ds Läbe vo Papa grisse. Nach däm Verluscht hät är syni Läbesfröid aber nid verlore. D Arbeit im Hushalt hät är vorbildlich gmeischteret. Jede Früehlig hät Papa si Garte apflanzt u sich drüber gfrüwt, wen är im Summer hät chönne Bohne ygfröre u im Herbscht Härdöpfel ychällere. O für d Bluemechischtleni ufe Balkon z transportiere hät Papa e Lösig gfunde. Mit syr Erfindig hät är syner prächtige Granium gfahrlos u eifach chönne uehi- u ahizügle. Velofahre u Loufe sy ä wichtige Bestandteil i sym Alltag gsy. Gärn, u vielmals o ganz spontan, isch är mitcho uf ene Usflug oder uf ene Wanderig. Das bis zletscht. Am früje Mentigmorge, am 28. Jänner, isch Papa uberraschend für üns alli gschtorbe.

Liebe Papa, liebe Grosspapa, wier danke dier für alls. Es isch schön u wier sy dankbar, hei wier diech dörfe ha. Wier vermisse di. Bhüet di Gott!

DYNI FAMILIE