Mi liebe Papi … Du hesch mier verzellt, dass du am 4. November 1942 im Spital Saanen uf d Wält bisch cho u i dr Sulz bi dine Eltere, dr Rosina Rubin-Moser us Rüeggisberg u em Edouard Rubin vo Saane, ufgwachse bisch.

Du heigsch ä schöni Chindheit gha u hesch di jede Früelig gfröit, z Bärg z gah. Am Grischbach entlang bis i d Merzere, am Fuess vo dr Pucelles, u iehr heiget albe bis nach Wiehnachte im Winterguet verbracht, wo der Wäg dür ds Tal us höi verschnit sig gsy, was wier üns hüt gar nimme chöne vorstelle.

Du hesch o gseit, dass due no es zwöits Mal uf d Wält sigsch cho, wo due i d Schuehl heigsch müesse. Ja, du hesch diner nün Jahr z Saane gmacht. Es isch nid immer eifach gsy, ds Schuelhus z erreiche im Winter, aber es het müesse si. Bsunderbar der Lehrer Hauswirth het drs ata gha wägem Gschichtsunterricht, u der Lehrer Schopfer wäg dr Naturkund.

Nach der Schuelzyt bisch im ganze Saaneland verschiedene Bure ga ushälfe, einisch ga hirte, ds andermal ga Suutrank füehre, u no mengs anders. Mit zwänzgi hesch due müesse i d Rekruteschuehl z Lausanne yrücke. Du bisch stolze uf Rougemont glüffe, für mit em Zug richtig Lausanne z gah, aber Gedanke u Chummer hets der kener gmacht, dass du d Sprach nid hesch chönne. De nach vier Monet bisch wider zrügg cho u hesch ds Französich beherrscht, als hätsches scho gings gredt gha. Dür das hesch ds Mami glehrt kenne amne Nüujahrsfeschtli z Rougemont. Äs isch nid lang gange, heit iehr nech ds Jawort gäh, am 10. Mai 1969, u i dr Sulz, ufem Heimetli vo der Familie Annen, gmeinsam afa bure.

Am 6. Januar 1970 isch ds erschte Chind vo drüne uf d Wält cho, dr Edouard – e Sohn, di ganz Stolz. Fasch zwöi Jahr speter, am 12. März 1972, bi iech, d Christiane, gebore. U de fehlt no di Chlini, d Cora, wo am 7. Ougschte 1975 gebore isch.

I bsinne mi no, wo due i der Videmanette zum Bure zuechi gwärchet hesch, als Sanitäter uf der Pischte – als Notfalltropfe äs Schnaps … Oh ja, du bisch sogar Gmeinrat gsy z Rougemont, im Gsamte 23 Jahr. Dini Lydeschaft het aber de Ross u Munige gulte, doch hei diers alli Tier ata gha, vo Geissi über Schaf, Chüeh, Hüehner, Chüngle, Chatzi u Hünd, o die hei der Fröid gmacht. Ja, weisch no, wod hesch Wullesüu gha? Ja, das het de doch nid grad e jede gha!

Im März 1993 hesch ä herte Schicksalsschlag erläbt: Diner geliebte Eltere si churz nachenand gstorbe u due hesch dend gseit, du heigsch di Vater, Fründ u Berater verlore … Ja, das esch hert gsy, u de no ersch als Einzelchind! Aber wie ds Läbe isch, hesch du all die Jahr e guete Fründ gha, wo due ihm Brueder gseit hesch: dr Fritz, wo dier gholfe het allz dürezstah u witerzgah, u de no mängs anders meh, wo du mit ihm hesch chöne bespräche. O diner Cousine u Cousins si dr immer wichtig gsy – Familie halt …

Am 14. Februar 1996 isch dis erschte Grosschind uf d Wält cho, dr Kilian – petit âne, wie due ihm gseit hesch – u 1997 d Nadja, dis Laferiwybli. De si 2005 dr Seth u 2007 dr Curtis, diner Unghür, u de 2012 no die Jüngschti, d Janna (Janna isch e Schatz) gebore. So hesch due für alli Grosschind ä Übername gha.

Was i ha gmerkt – hesch es nid müesse verzelle – isch dini Menschekenntnis gsy: Du hesch so viel gwüsst vo vilne Lüt u ihrne Vorfahre. We wier hei öppis welle wüsse vo disem oder eim, hesch sofort chöne Antwort u Uskunft gä u de no der ganz Stammboum drzue gwüsst. Ja, Papeli, due wirsch üns no mengisch fehle u nit nume hüt … Aber mier müesse nume i d Merzere ga wandere, wo due 60 Jahr lang mit Lyb u Seel z Bärg bisch gsy, oder i dr Rüble, wo due derna o no sächs Jahr z Bärg gange bisch u zwölf Wintere d Buvette hesch gfüehrt mit em Mami u em Edouard. De chöme volli Erinnerige, wo wier nid wärde vergässe. Das hesch mer nümme müesse verzelle, das heimer miterläbt.

Im April vo däm Jahr isch dier gar nid guet gange, du bisch für zwo Wuchi i ds Spital cho, aber sie hei di wider ufpäppelet u äs het mi tünkt, es göng dr rächt guet. U so isch äs gsy bis am 8. Ougschte, wo due mitem Atme hesch müesse kämpfe. De bisch wider im Spital glandet u äs het eifach nid welle bessere. Am 10. Ougschte hei si di uf Lausanne ids CHUV ygliferet, für dass du hesch chönne entspanne u schlafe. Dass es dier besser isch gange, hei sie di ids künschtliche Koma gsetzt. Aber dis Härz esch so müed gsy, dass du am 11. Ougschte für immer ine tiefe Schlaf gwanderet bisch.

Liebe Papi, häb Sorg, bhüet di Gott u chum guet heim i diner himmlische Bärge! Ha di gärn – u, wie du tätsch antworte: «O gärn.»

DIS CHRIGELI